Es veierezwansischsde Deersche...

 Unn jetz mache mer es letschd Deersche vunn uhrem Advennskalenner uff...

Wie dem Anna sei Merri der Boub kreijt hott

Hear, das war der sellischmols, wie de Au-huschd se all gehääß hott, weil er se ziehle wollt. Doh is donn jeder erschdemol ab hääm. Aach der Davidsjupp is ab, iwwer Feld, unn seins is aach gleich met.

Der hatt joh das Merri vunn de ald Anna pousseerd. Das war joh in annere Umstänn- mer seeht, es wär gaanet vun ihm geweescht. Unn was määnsche, wie die grad iwwers Helljeheisje komme, doh seeht iehs, es wärem net so unn er soll emol dabber gugge, dasse unner komme. On Mauersch war käh Lischd mee, doh senn se in de nägschde Schopp geschlubbt.

Se honn donn nom Doggder geschickt, awwer es hot gehääß, se mischde sich in Määsem an de Bereidschaftsdienschd halle, doh honn ses dann leijwer gleich senn loss. Es war aach die Zeit nimmee.

Jäerh Gott, was willsche doh mache. De Jupp daacht nohre, es wär e bissje arisch freij, awwer gesaaht horrer nix. Se ware noch gaanet gericht, noh, es is aach so gang. Es Merri saht: Jupp, mach der käh Kobb, doh, nemmen emol, un wenn'er der zu schwer is: Doh vorre irre Fourerkribb, doh kannsche'ne eninnleje.

"Jessas, Merri", hott de Jupp gesaht, "mer honn e Boub!"
Das hott so e Dorfstross geheert un hott's aach glei balljäerscht: "Jessas nääääää, das Merri hott ebbes Kläänes kreijt! Denk emol oon, dem Anna sei Merri hott e Boub, Schwälläääd!"

Was määnschd donn dau, doh senn Himmel un Mensche komm, fer dem Merri sei Boub se seijn!

Se harre aach all ebbes debei, doh hott sich kääner lumbe geloss, un dann honn se noch lang gefeiert.

 Hinne hott dann äähns gerouf: Es Gewirrer Dunnerkeil, was is dann das so hell doh drauß?

Un de nägschd saaht: Weeje dir wehre se e neier Stäern uffgehn geloss honn, Du Eewegreet! Guggemol uff die Uhr, es is heller Daach!

Gut, se konnte noch e bissje hugge bleiwe, 

es war joh Feierdaach, unn se harre all Zeit. 

(Wäersche, was die Lina-Goot saht, wie se das gewahr wor war?

Uff die Weihnachde hott das ebbes Kläänes krieht??? Ei das werd mer e scheen Krischkinnche geweeschd senn!)

 Froo'e Weihnachde!